فارس الاحلام

فارس الاحلام


فارس الاحلام
فارس كل البنات
كتير عنه الكلام
وبينتهي بسكات


فارس الاحلام


مات وسط الظروف
و ف غياب المبادئ
وف وسط جهل وخوف
وتزييف الحقايق


بقي وهم ومش حقيقه
بقي نادر بشده
والاحلام البريئة
اتشوهت بحده


الفارس هو مين
معاه فلوس وقوة
مش فارقه جاب منين
بحلال او كان فتوة


وان جه فارس الزمان ده
ودق الباب وقال
انا عندي ثروه جامده
ومعايا كوم عيال


يتقال له الف مرحب
وبلاش كلام غريب
بوجدك بيتنا نور
بالثروه العيب يغيب


ان جه راكب حصان
او حتي حمار خشب
مركب طقم سنان
او مجهول النسب


عنده شقه جاهزه
م الابره للصاروخ
ودليل الفخفخه
الكرشه اهو منفوخ


وعاش الكرش عاش
طالما عنده كاش
وعشان فلوس الحلو
البنت دي ماتغلاش


وتتسال الصبيه
ايه رايك ف العريس
وفقي ماتبقيش غبيه
هيسفرك باريس


وان قالت عاوزه واحد
عنده اخلاق ودين
يكون الرد واحد
عنده هموم ودين


وان قالت مستقيم
ومالوش ف اللغبطه
يقولولها كلام قديم
دي عشته ملغبطه


ده يابنتي ع الحميد
وجيوبه منفضه
ده باع حتي الحديد
وماحلتوش اللضي


والعريس ده لقطه
واياكي تقولي لاء
ده جيبلك حته شنطه
ماليانه حاجات بحق


صحيح فيه عيوب
لكن الفلوس تداري
وعيب الراجل جيوب
وإن كان ناصح وقاري


وخلاص بقت بناتنا
موجوده ف سوق نخاسه
واللي تفوز بالغني
تبقي صاحبة فراسه


أما الخيبه العبيطه
واللي مال بختها
من تخده فقير ودقه
وبتندب حظها


واتنست الاخلاق
والاصل والنسب
والدين بقي وباء
والشفا ف الدهب


خلاص بقت حياتنا
مشيه بالمقلوب
ف الفلوس رحتنا
وربك رب قلوب


تاه خلاص الفارس
راح مع الكوارث
والكل عايش عايش
ويقولك الله حارس